" శ్రమము నందు మనకు శాంతి దొరకు "

కొడుకు లుండె గాని కోడలి దాస్యము
మనుమ లున్న నేమి మమత కరువు
ప్రేమ యనగ వరము పిడికె డైనను గన మా
శ్రమము నందు మనకు శాంతి దొరకు

" కలమును త్యజియించి పొందె గవియను పేరున్ "

కల మెందుకు నాసు కవికి
విలసితముగ జెప్పు నతడు విశ్వ జనీనన్ !
కొలువై యుండును సరస్వతి
కలమును త్యజియించి పొందె గవియను పేరున్ !

" దిక్కు లేని వాడు దినకరుండు "

నాల్గు దిక్కులందు నలు వైపు లందుండు
ఆది దేవు డనగ నతడె గనుక
జీవ రాసులన్ని జీవించు నతడిపై
దిక్కు లేని వాడు దినకరుండు.

" తలలు వంచి గగన తలము గనుడు "

కొలను లోన దిగిరి కొమ్మలందరు గలసి
జలక మాడ బోవ చెలువు మీర
నదము నందు కనగ నిండు తారల శశిని
తలలు వంచి గగన తలము గనుడు !

" నవ్వి పోనిమ్ము లేదులే నాకు సిగ్గు ! "

వలపు విరహాల సంకెల బిగుసు కొనగ
ముద్దు మురిపాలు పంచగ మంగ చెంత .
కొండ దిగి దిగి నడిరేయి గడచి యైన
నవ్వి పోనిమ్ము లేదులే నాకు సిగ్గు.!
----------------------------------
పెద్ద వయసున నేర్చిన విద్య లెపుడు
వమ్ము కాబోదు చదివిన వింత హాయి
వయసు బేధము లెదన విద్య కెపుడు
నవ్వి పోనిమ్ము లేదులే నాకు సిగ్గు