" పదుగురు గనంగ వనిత వివస్త్ర యయ్యె "

గోడపై నొక చిత్రము జూడ గాను
జలక మాడగ జలజాక్షి కొలను లోన
వలువ లొలిచిన రీతిగ కలిగె భ్రాంతి
పదుగురు గనంగ వనిత వివస్త్ర యయ్యె !

" దోచు కొన్న వాడె తోడు నీడ "

మనసు లోన నిలిచి మమకారమును పెంచి
కలిమి లేము లందు కలసి మెలసి
కల్ల కపట మనక యుల్ల మందున ప్రేమ
దోచు కొన్న వాడె తోడు నీడ !

" గొడ్డురాలైన తల్లికి గొడుకు మ్రొక్కె "

రోడ్డు ప్రక్కన సొగసైన బిడ్డ దొరికె
దైవ మిచ్చిన వరమంచు దత్తు డనుచు
ముద్దుగా పెంచి యాతని పెద్ద జేయ
గొడ్డు రాలైన తల్లికి గొడుకు మ్రొక్కె !

" పండితుని జూచి నవ్వెను పామరుండు "

సీమ చదువులు చదివిన సోముడొకడు
కోన సీమకు చేరెను కోర్కె మీర
గౌతమిని దాటు విధమును గాన నట్టి
పండితుని జూచి నవ్వెను పామరుండు !

" గాలి కబురు లిపుడు గణన కెక్కె "

చల్ల గాలి కెపుడు మెల్లగా వెంటాడి
ఉల్ల మందు హాయి ఝల్లు మనగ
కొల్ల గొనకు మదిని కల్లలాడి చెలికి
గాలి కబురు లిపుడు గణన కెక్కె !
-------------------------------------
జాలి పడకు మెపుడు నీలి వార్తలు వినుచు
గేలి చేతు రంత బేల వనుచు
రాలు గాయి జనులు రాజిల్ల నీయరు
గాలి కబురు లిపుడు గణన కెక్కె !

" సరసము దెలియని మగనిని సతి మెచ్చు కొనెన్ "

నిరతము జపములు చేయుచు
పరదారను పలుకరింప ప్రవరుని వలెనన్ !
మురియుచు గరువము నొందుచు
సరసము దెలియని మగనిని సతి మెచ్చు కొనెన్ !

" గణ నాయక సుత ! వినాయకా ! వందనముల్ ! "

గణ నాదుడవని నిను
ప్రణతిగ నే కొలువ గలుగు భాగ్యమునిమ్మా !
గణు తింపక దోషములను
గణ నాయకసుత ! వినాయకా ! వందనముల్ !